على إثر تلقّينا لمناشدات عديدة و برقيات صادرة من عديد المنضمات و الجمعيّات الماسونيّة قررت نحن المعتصم بالهندي إفتتاح بلوغ يكون همزة وصل بين زبراطستان و تونستان .
ممكن ياسر برشا عباد ما يعرفونيش أنا شكون , أنا كيف ياسر توانسة من الجماعة إلّي تغرمو بالسياسة نهارت إلّي التونسي قتل روحو من الهم و الفقر , و كرهتها كيف التونسي قتل التونسي على خاطر طرح شكبّة .
أنا كيف برشا توانسة , تغرمت بالسياسة و بريحت الغاز و صوت الكرتوش . و كرهتها كيف إلّي قتلنا طلع إشاعة .
أنا كيف برشا توانسة زادة , عرّاو سدورتهم للقنّاصة بش نضمن حق الإختلاف , و اليوم ولّينا يا تكون كيفي و إلّا نولّي تجمّعي ماسوني .
و على كل مرحبا بيكم في محلّي , و نحب نطمأنكم إلّي أي نوع من القباحة و ضربان اللغة هي من محض القصد العمد و سوء النيّوة و نحن نتحمّل مسؤوليّة كل رميان معنى يحدث داخل البلوڨ
